Í dag fimmtudaginn 14. janúar er troðin braut í Selárdal tæpir 2 km.  Aðstæður er góðar í dalnum, logn og 8 stiga frost.  Hægt er að kveikja á ljóskösturunum við brautina í töflu á gólfinu í bragganum og í töflu í gámnum.

Skíðagönguæfingar eru hafnar hjá Skíðafélagi Strandamanna, æfingatafla vetrarins lítur svona út:

þriðjudagar kl. 18-19 línuskautar í íþróttahúsinu Hólmavík

Miðvikudagar kl. 17.30-18.30

Föstudagar kl. 17-18:30

Sunnudagar kl. 13-14.30

Skíðaæfingarnar fara fram á skíðasvæðinu í Selárdal nema annað sé tekið fram.  Sent er sms um hvort af æfingu verður í síðasta lagi um hádegi daginn sem æfingin er, einnig er sent sms ef lagðar eru skíðabrautir aðra daga.  Þeir sem óska eftir að fá sms um æfingar og brautir hafi samband við Ragnar í síma 8933592 eða á facebook.  Einnig eru settar inn upplýsingar á facebooksíðu Skíðafélags Strandamanna og á þessa síðu.

Æfingagjald á skíðagönguæfingar Skíðafélags Strandamanna er 8.000 kr.  Nýir iðkendur eru sérstaklega velkomnir.

Þjálfarar Skíðafélags Strandamanna í vetur eru:  Ragnar Bragason, Sigríður Jónsdóttir og Rósmundur Númason.

Sunnudaginn 19. apríl kl. 11 verður boðganga í Selárdal, mótið er firmakeppni og verður raðað í þriggja manna lið þannig að liðin verði sem jöfnust.  Við hvetjum alla til að vera með, en auglýsum jafnframt eftir fyrirtækjum sem vilja eignast boðgöngulið.   Boðgangan er jafnframt síðasta skíðamót vetrarins af átta sem haldin eru árlega.  Í Selárdal er enn nægur snjór og góðar aðstæður til skíðagöngu þrátt fyrir hlýindi síðustu daga.

Verið er að taka saman pöntun á hettupeysum merktum sfs sem yrðu komnar fyrir andrésarandarleikana áhugasamir hafi samband sem fyrst við Þuríði í síma 6936803, á Facebook eða vp@internet.is

Skíðamót Arionbanka verður haldið í Selárdal 2. Apríl skírdag og hefst kl. 13 gengið verður með hefðbundinni aðferð og eru vegalengdir 15 km í karlaflokki og 7,5 km í kvennaflokki, í barnaflokkum eru styttri vegalengdir.  Skráning fer fram á staðnum og eru allir velkomnir.

Sparisjóðsmótið í skíðagöngu verður haldið í Selárdal mánudaginn 6. apríl annan dag páska og hefst kl 13.  Gengið verður með frjálsri aðferð, vegalengdir eru 10 km í karlaflokki og 5 km í kvennaflokki, í barna flokkum eru styttri vegalengdir.  skráning fer fram á staðnum og eru allir velkomnir.

Skíðafélag Strandamanna

Á morgun sunnudaginn 22. mars verður haldið skíðaskotfimimót í Selárdal, mótið hefst kl. 12 og er gengið með frjálsri aðferð, vegalengdir við allra hæfi.

Úrslitin úr sprettgöngunni sem haldin var í dag í Selárdal eru komin á síðuna undir liðnum úrslit.  Við þökkum starfsmönnum göngunnar fyrir vel unnin störf og keppendur fá þakkir fyrir þátttökuna.

Á morgun sunnudaginn 15. mars verður haldið sprettgöngumót í Selárdal og hefst það kl. 14.  Gengið verður með frjálsri aðferð.  Gengnir verða þrír sprettir, fyrst tímataka með einstaklingsstarti, síðan hópstart aldursflokkaskipt og síðasta umferð verður í opnum flokkum karla og kvenna þar sem ræst verður út með forgjöf.

Úrslitin úr 21. Strandagöngunni eru komin á síðu Strandagöngunnar undir liðnum úrslit.  Ef þið sjáið eitthvað athugavert við úrslitin hafið samband á facebook, í tölvupósti (sigrak@simnet.is) eða síma 8933592 (Ragnar).  Strandagangan var haldin í dag laugardaginn 28. febrúar 2015 í Selárdal,  Þátttakendur í göngunni voru alls 61.  Veður var ágætt til að byrja með hægviðri, frost 3 stig og jafnvel sólskin öðru hvoru, þegar leið á gönguna hvessti og fór að skafa og var síðasti hringurinn hjá sumum í 20 km vegalengdinni nokkuð strembinn þess vegna.  Myndir úr göngunni er að finna m.a. á mundipals.123.is og holmavik.123.is   Skíðafélag Strandamanna þakkar þeim sem komu og tóku þátt í Strandagöngunni fyrir þátttökuna.  Starfsmenn göngunnar fá góðar þakkir fyrir einstaklega vel unnin störf við framkvæmd göngunnar.  Sjáumst í 22. Strandagöngunni 2016.

Strandagangan verður haldin í Selárdal á morgun 28. febrúar, ræst er í 1 km kl. 12.30 og 5, 10 og 20 km kl. 13. Veðurspáin fyrir Selárdal á morgun er í lagi: Norðnorðaustan 7 m/s, 4 gráðu frost, skýjað með köflum og úrkomulítið.

Við hvetjum fólk til að skrá sig sem fyrst í Strandagönguna sem haldin verður 28. febrúar.  Veðurspár hafa heldur farið batnandi fyrir helgina eftir fremur rysjótt veðurfar nú í vikunni þannig að við höldum okkur við þá áætlun að Strandagangan fari fram laugardaginn 28. febrúar, en sunnudagurinn 1. mars er varadagur.  Spáin fyrir laugardaginn segir norðaustan 6 m/s frost 4°c skýjað og smá él.  Breyttar snjómokstursreglur Vegagerðarinnar eru okkur hagstæðar þar sem nú er kominn 7 daga mokstur um Þröskulda og Steingrímsfjarðarheiði í stað 6 daga moksturs undanfarin ár.  Aðalbjörg Óskarsdóttir tekur við skráningum í Strandagönguna á netfangið allaoskars@gmail.com eða á Facebook

Undirbúningur fyrir Strandagönguna 2015 gengur vel, verðlaunagripir verða veglegir eins og undanfarin ár, nægur snjór er í Selárdal og eru allar líkur á að hægt verði að ganga 10 km hring fram að Gilsstöðum í Selárdal.  Spáin fyrir helgina er einnig góð, en yr.no spáir hægri suðlægri átt og bjartviðri.  Við viljum hvetja fólk til að skrá sig sem fyrst í gönguna til að auðvelda undirbúning og minnum einnig á að hægt er að vera með í sveitakeppni í 5, 10 og 20 km vegalengdum þar sem samanlagður tími þriggja keppenda gildir.  Einnig viljum við hvetja börn á öllum aldri til að vera með í skíðaleikjadeginum sunnudaginn 1. mars kl. 10-12 í Selárdal.  Það er kjörið tækifæri að skella sér í leikhús á Hólmavík að Strandagöngunni lokinni á því Leikfélag Hólmavíkur? verður með 3. sýningu á leikritinu Sweeney Todd laugardaginn 28. febrúar kl. 20 í Félagsheimilinu á Hólmavík.

Á aðalfundi Skíðafélags Strandamanna sem haldinn var 26. Janúar 2015 var samþykkt að innheimta brautargjöld og æfingagjöld á Skíðasvæðinu í Selárdal.  Brautargjöld greiða allir 17 ára og eldri, gjald fyrir daginn er 500 kr en einnig er hægt að greiða vetrargjald sem gildir allan veturinn 8.000 kr.

Æfingagjöld verða kr. 8.000 fyrir veturinn, en þau greiða börn á grunnskólaaldri sem æfa skíðagöngu hjá Skíðafélagi Strandamanna.  Börn á leikskólaaldri greiða engin æfingagjöld.  Innifalið í æfingagjöldunum er skráningargjald á Andrésar-andarleikana sem Skíðafélagið hefur ávallt greitt fyrir sína keppendur.

Skíðafélag Strandamanna hefur staðið fyrir skíðagönguæfingum síðan árið 2000 alla tíð án æfingagjalda, öll vinna við þjálfun og brautarlagningu hefur verið unnin í sjálfboðavinnu og verður það áfram.   Ástæða fyrir að æfingagjöld og brautargjöld eru tekin upp núna er sú að Skíðafélagið er komið af stað í framkvæmdir við að reisa skíðaskála í Selárdal.  Í skíðaskálanum verður öll nauðsynleg aðstaða tengd skíðaiðkun, svo sem aðstaða fyrir starfsmenn móta, salerni, smurningsaðstaða, eldhúskrókur, borðsalur og geymslu og viðgerðaraðstaða fyrir snjóbíl og sleða.

Þar sem nú er nokkuð liðið á þennan vetur og tilkynningin um brautar-og æfingargjöldin kemur seint fram verður ekki gengið stíft eftir því að fólk greiði vetrargjaldið fyrir brautargjöld þennan veturinn heldur höfðum við til samvisku fólks hvort það vill leggja sitt af mörkum til bættrar aðstöðu á Skíðasvæðinu í Selárdal.

Vala Friðriksdóttir gjaldkeri Skíðafélags Strandamanna tekur við greiðslum fyrir æfingargjöld og brautargjöld hægt er að hafa samband við hana á Facebook, í tölvupósti valaf@simnet.is eða í síma 8616193.

Skráning í Strandagönguna 2015 er hafin.   Skráningar skal senda á netfangið allaoskars@gmail.com í skráningunni þurfa að koma fram eftirfarandi upplýsingar:

Nafn keppenda

Fæðingarár

Félag

Vegalengd

Gsm-símanúmer

Kristbjörn Sigurjónsson (Bobbi) í Craftsport á Ísafirði verður með smurningsnámskeið á Hólmavík fimmtudaginn 12. febrúar kl. 17.  Bobbi verður með skíðaáburð og skíðavörur til sölu á staðnum auk þess að miðla af reynslu sinni í meðhöndlun skíða þ.e. bræða rennslisvax undir og setja festuáburð undir skíðin.   Staðsetning er að Víkurtúni 10 í bílskúrnum hjá Rósmundi formanni Skíðafélags Strandamanna.